En Urba biblioteko  kaj legejo Pula estis la 3-an de decembro 2008 malfermita ekspozicio Historio de skriboj tra jarcentoj. La ekspozicio prezentis dokumentojn de sumeraj kojnoskriboj kaj egiptaj hieroglifoj ĝis glagolica, kirila kaj latina skriboj. Esperanto peris plurajn dokumentojn por la ekspozicio, kiuj venis el la riĉa arkivo de veterana esperantisto Ivo Borovečki. Pri la ekspozicio parolis Nela Načinović, Ivo Borovečki kaj Liana Diković. Istria TV Nova intervjuis D-ron Ivo Borovečki kaj la ampleksa elsendo kun plurfoja mencio de Esperanto estis kvar fojojn elsendita. La publiko povis viziti la ekspozicion omaĝe al la Internacia jaro de lingvoj  en la Urba biblioteko de Pula  ĝis la  15-a de decembro 2008.

La 22-an de decembro 2008 la Urba Konsilantaro de Osijek akceptis la proponon, ke unu strateto en la osijeka urboparto nomata Malsupra Urbo, ricevu la nomon Esperanto-strato (Esperantska ulica). La ideon lanĉis antaŭ kelkaj jaroj kaj preparis la necesajn dokumentojn por la longa decidprocedo de pluraj urbaj instancoj Esperanto-societo “Liberiga Stelo”. Starigo de strata nomŝildo espereble okazos en januaro 2009, kaj la 17-an de oktobro 2009 Osijek gastigos jaran renkontiĝon de kroatiaj esperantistoj.

Zagrebanino laŭ loĝadreso (kien ŝi translokiĝis en 1951), ŝi naskiĝis la 2-an de januaro 1920 en Ronjgi-Viškovo apud Rijeka. Ŝi estis  kuzino de la konata kroata poeto Ivan Matetić Ronjgov. Kvankam ŝi malfrue aktiviĝis (en 1995/96), ŝi interesiĝis pri Esperanto jam en 1936, kaj unuafoje vizitis Esperanto-kurson en 1953. Ŝi estis unu el la plej aktivaj membroj de Esperanto-societo “Bude Borjan” en Zagrebo, respektive ĝia plej maljuna membro, kaj ofta helpantino de Kroata Esperanto-Ligo.  Kiam fondiĝis Unuiĝo de Zagrebaj Esperantistoj, ŝi aliĝis inter la unuaj, kaj aktive subtenis finance aperadon de la revuo  “Zagreba Esperantisto”. Tiujn, kiuj konis ŝin, ŝi aparte impresis per sia pozitivisma starpunkto, juneca  optimismo kaj nesimileco al siaj samgeneracianoj. Ŝi estis  aktivega montgrimpanto, verkis poemojn, ŝakludis, kegloludis, dancis, finis informadikan kurson kaj bone uzis poŝtelefonon, SMS-mesaĝojn ktp ... Ŝi vizitis plurajn Esperanto-aranĝojn en  diversaj landoj: Hungario, Nederlando, Danlando, Francio, Ĉeĥio, Slovakio, Italio. El la rondo de zagrebaj kaj kroatiaj esperantistoj la morto forprenis ŝin la 11-an  de januaro 2009.

Ŝi naskiĝis en Beograd (Serbio) la 21-an de majo 1937, esperantistiĝis en Zagrebo kaj partoprenis plurajn Esperanto-aranĝojn, interalie la kongreson de jugoslaviaj esperantistoj en Ljubljana. Ŝi estis membrino de zagreba Esperanto-societo “Bude Borjan”. Forpasis la 27-an de marto 2008.

Samideano Vinko Milinković estis nesufiĉe konata al niaj esperantistoj, kvankam liaj politika kaj  Esperanta biografioj estas kapturne interesaj.  Li naskiĝis la 19-an de marto 1917 en Stari Mikanovci en Slavonio, kaj li estis unu el la plej aĝaj esperantistoj en Kroatio. Gimnaziano li estis en Slavonski Brod, la plej forta tiutempa Esperanto-centro, kie ekaperis ankaŭ la plej fruktodona Esperanto-gazeto “La Suda Stelo”. Li apartenis al la generacio kiu esperantistiĝis en la tre grava jaro 1935 (en kurso gvidita de Marko Demetrović), kiam la enlanda movado sukcesis venki la t.n. “organizan problemon”, kaj en la jaro en kiu la landa esperantistaro kongresis en Osijek, en koro de slavonia regiono. Li kontribuis per kelkaj artikoloj al “La suda stelo” kaj “Skolta Esperantisto”. Antaŭ la dua mondmilito li komencis studi agrikulturon en Zagrebo, kaj ekde tiu tempo li fariĝis politike aktiva en la maldekstrula studenta movado. Pro la politika laboro li estis arestita de ustaŝoj en majo 1941 en sia naskiĝloko Stari Mikanovci kaj transportita en la koncentrejon Kerestinec. Tie samtempe troviĝis aliaj famaj politikaj maldekstruloj: Božidar Adžija, Ognjen Prica, Otokar Keršovani kaj aliaj.

Premio “Kalendulo” estas mona premio de 1000 eŭroj, kiun jam la duan fojon atribuis ankoraŭ neoficialigita Fondaĵo “Kalendulo”, iniciatita de kroatia esperantisto Neven Kovačić, granda mecenato de Esperanto. La iniciatinto anoncis baldaŭan oficialigon kaj senpersonigon de la mecenata fondaĵo (legu detale en “Zagreba Esperantisto” n-ro 4(8)/2008), kies celo estos ĉiujare subteni finance gravajn projektojn kaj aktivajn personojn kiuj agas por Esperanto. La jubilea kunveno “Centjariĝo de Esperanto en Kroatio”, okazinta la 13-an de decembro 2008 en Zagrebo, estis la plej bona loko por publika proklamo de la ĉi-jara laŭreato. Laŭ la oficiala proklamo legita de Neven Kovačić mem, la ĉi-jara laŭreato estas Lucija Borčić, veterana esperantistino el Zagrebo, honora membro de UEA