En Lendava (Slovenio), sabaton, la 12-an de septembro okazos la jam tradicia turisma-kultura aranĝo “Lendavska trgatev” (Lendava plukado) en kiu partoprenos diversaj kulturaj societoj el Lendava kaj ĉirkaŭaj vilaĝoj. Kolektiĝas grupeto de slovenaj, hungaraj kaj kroataj esperantistoj kiuj volas partopreni en la festa marŝado kun Esperanta flago. Se vi estas libera tiutempe, aliĝu kaj venu al la proksima slovena komunumo Lendava, interalie por ĝui la banadon en la tiea termalbanejo. La aranĝo komenciĝos je la 11h00 per festa marŝado tra la urbo, en longeco de proksimume 1500 m. La starto estos ĉe la malnova Mezlernejo en Fö utca 84 (Ĉefstrato n-ro 84) kaj la fino antaŭ la hotelo "Elizabeta", kie daŭre okazos kultura programo, prezentota de diversaj kulturaj societoj (naciaj dancoj, recitaloj, kantĥoroj en la slovena kaj hungara lingvoj). La celo de la defileo estas montri malnovajn morojn pri plukado de vinberoj, ilia premado kaj produktado de mosto–vino).

Internacia Ligo de Esperantistaj Instruistoj (ILEI) estas la ĉefa organizaĵo por instruistoj kaj edukistoj de Esperanto. Ĝi havas operaciajn rilatojn kun Unesko kaj estas aliĝinta faka asocio de Universala Esperanto-Asocio havanta  sekciojn en pli ol 30 landoj kaj membrojn en pli ol 45. Startinte en 1949 en Bournemout (Britio), ILEI estas respektinda 60-jarulo, kaj sian jubilean  42-an Konfrencon ĝi okazigas en la pola urbo Krakovo. Inter la 17-a kaj 25-a de julio en la Supera Lernejo de Direktado kaj Bankismo (WSZiB) kolektiĝis 75 partoprenantoj el trideko da landoj. Ĉe la malferma ceremonio de la Konferenco, parolinte en Esperanto la 17-an de julio, prof. d-ro habil. inĝ. Wlodzimierz Roszczynialski, la rektoro de WSZiB diris: “Kun ĝojo kaj plezuro mi bonvenigas la partoprenantojn de la Esperanto-Konferenco, kun ĝojo des pli granda - ĉar en la jaro 1963, kiel junulo, mi partoprenis Internacian Esperanto-Kongreson en Gyula (Hungario). Tiu ununura, bedaŭrinde, kontakto kun tiu lingvo lernigis al mi grandan respekton kaj admiron por Vi, kiuj en universala mondo, trovas ĝojon pro renkontiĝoj en spirito de Zamenhof.”

La ekonomika fakultato de la Universitato Göttingen en Germanio distingis la Nobel-premiitan profesoron Reinhard Selten per honordoktora titolo. Dum la la festa laŭdado prof-ino Claudia Keser (kiu iam mem eklernis Esperanton), diris kelkajn frazojn en bonkvalita Esperanto al la tuta aŭskultantaro. La distingan sesion partoprenis multaj eminentaj profesoroj el Germanio kaj eksterlando. Dum la festo oni kelkfoje menciis Esperanton, eĉ sian fakan prelegon profesoro Selten mem komencis en la Internacia Lingvo.

De Francio, tra Italio, Slovenio, Kroatio, Bosnio kaj Hercegovino, Montenegro, Grekio, Turkio, Irano, Pakistano, Hindujo, Bangladeŝo, Tajlando, Singapuro, Indonezio, Aŭstralio, Kanado, Usono, Sudameriko, tra Afriko, Portugalio kaj Hispanio reen al Francio - per bicikloj, uzante la francan kaj Esperanton, ekvojaĝis la franca Esperanto-paro Cyrille Pinardon kaj Rose Sanz.

Al la vojaĝo de sia vivo la 40-jaraj geedzoj Cyrille kaj Rose, poŝtoficistoj el Parizo, ekveturis la 16-an de marto, kaj post 40 tagoj da biciklado ili atingis  fine de aprilo la kroatian urbon Split, kie ĝoje renkontis ilin la splitaj geesperantistoj Anđelko Drnasin, Davor Grgat, Etel Zavadlav, Vukašin Dimitrijević kaj Tonka Grgat (al kiuj aliĝis ankaŭ la fotoraportisto Feđa Klarić kaj ĵurnalistino Mirela Goreta el la splita taggazeto “Slobodna Dalmacija”).

De la 24-a (vendredo) ĝis la 26-a (dimanĉo) de aprilo en Dobrá Voda (Slovakio) okazos Tutslovakia Esperanta Renkontiĝo 2009 http://skej.esperanto.sk/arangoj.php?lingvo=eo&kio=118. La renkontiĝon organizas Slovakia Esperanta Junularo kaj Slovakia Esperanta Federacio.

Vilaĝo Dobra Voda situas 25km okcidente de Piešťany, 28km norde de Trnava - en valkaldrono, ĉe la piedo de montaro Karpaty. Oni povas atingi ĝin per aŭto aŭ buso.

Ĉefa temo de la aranĝo estas 150-a datreveno de naskiĝo de L. L. Zamenhof. Programo inkludas etan kurson de Esperanto, kurson de origami, vojaĝmemorojn, diskuton pri Esperanto-movado en Slovakio, prezentacion de artaj bildoj kaj filmoj kun Esperantaj subtekstoj, ekskurson, literaturan angulon, libroservon, ludojn, kvizojn, kulturan programon...

Pasintjare serbiaj esperantistoj komune festis Zamenhofan tagon sabaton la 13-an de decembro en Kragujevac, la urbo kie la Esperanto-movado iam estis tre vigla kaj kie la Zamenhoftaga festo estis utiligita por refondo de Esperanto-societo. La iniciatinto kaj organizanto de ĉi tiu kunveno estis konata kragujevaca esperantisto kaj aktoro Saša Pilipović. Alvenis gastoj el Beograd, Niš, Zemun, Jagodina, Leskovac, Vranje, Zaječar, Čačak kaj Novi Sad, kaj partoprenis ankaŭ Višnja Branković el Triesto kaj Mićo Vrhovac el Banja Luka (Respubliko Serba, Bosnio kaj Hercegovino). Krom la riĉenhavaj prelegoj de Boriša Milićević, mr Radojica Petrović kaj Tereza Kapista, en la programo partoprenis ankaŭ Čedomir Štajn kaj Nikola Milojević, aktoroj de la urba teatro, la poetino Senka Tomić el Jagodina, zemunaj lernantoj el la lernejo por infanoj kun difektita vidpovo kie Esperanto estas instruata seninterrompe jam okdek jarojn, kaj per kabaredoj luditaj dum  pasintaj universalaj kongresoj, prezentigis Saša Pilipović .