Dum la Zamenhoftaga festo en Bjelovar, la reprezentantoj de Unuiĝo de Zagrebaj Esperantistoj  (UZE) kaj Dokumenta Esperanto-Centro el Đurđevac (DEC) subskribis donackontrakton favore al modernigo de la oficeja ilaro de DEC.

 

Ekde sia fondiĝo en 2007, UZE senĉese subtenas la laboron de DEC konsiderante ĝin grava institucio de la kroatia Esperanto-movado. La plej grava celo de DEC estas okupiĝi pri arkivado kaj dokumentado de Esperanta laboro en Kroatio, sekve esti nacia Esperanto-arkivo, sed ne malpli grava estas ankaŭ ĝia organiza laboro (ni rememoru la organizadon de la 9-a kaj 10-a kongresoj de kroataj esperantistoj en Bjelovar kaj Koprivnica, fondon de societoj en Bjelovar kaj Križevci, starigon de memortabulo al Ilija Puhalo en Koprivnički Bregi, gvidadon de kursoj diversloke, starigon de pluraj ekspozicioj, realigon de televidaj elsendoj ktp). Oficiale DEC fondiĝis en 2010, sed UZE partoprenis aktive la kampanjon por ĝia fondo kaj financa prizorgo jam en 2008. Jam delonge senteblis la neceso havigi por DEC bonkvalitan fotokopiilon, kaj UZE decidis donaci la necesan sumon de preskaŭ 1000 eŭroj por ĝia aĉeto. La afero estis publike konigita en Bjelovar, kaj la 9-an de januaro 2013 DEC ricevis la novan plurfunkcian maŝinon Canon iR2520 konektitan al novaĉetita Toshiba-komputilo.