Anoncante la “Esperanto-tagon”, kiun la monda esperantistaro festas la 26-an de julio kiel la daton kiam aperis la Unua libro de Esperanto, en Brežice (Slovenio) la 25-an de julio okazis Internacia Amika Esperantista Renkontiĝo (IAER). Je unu tago ĝi anticipis ankaŭ la unikan aranĝon, la 100-an Universalan Kongreson de Esperanto, kiu la 26-an de julio komenciĝis en la franca urbo Lillo. La IAER-aranĝo ne pretendis esti granda, sed tamen bedaŭrindas, ke ĝi ne sukcesis veki almenaŭ pli grandan atenton ĉe la najbarlandaj esperantistoj. La renkontiĝon tre fervore organizis (ankoraŭ) neformala Esperantista klubo de Posavje (EKP), kunlabore kun Slovenia Esperanto-Ligo (SlEL), sed evidentas, ke la ĉefan organizan rolon ludis la kluba prezidanto Anton Mihelič. La ĉefa temo de la aranĝo estis “Regiona kunlaboro inter Esperantaj societoj”. Ĝi refreŝigis la ideojn de la translima esperantista kunlaboro, kia ekzistis en la pasinteco.

Efektive, la renkontiĝo en Brežice fariĝis slovena-kroata kunveno (kun unu partoprenanto el Bosnio kaj Hercegovino). Kiam la informo pri la organizado de IAER estis lanĉita, en Kroatio regis sufiĉe granda intereso por partopreni ĝin, kaj estis planitaj eĉ kelkaj grupvizitoj. Komunan busvojaĝon por 28 kroataj esperantistoj el diversaj urboj organizis Dokumenta Esperanto-Centro el Đurđevac, sed venis ankaŭ kelkaj aliaj kroatoj per aŭtomobiloj. Menciindas, ke estis reprezentitaj  Bjelovara Esperantista Societo, Dokumenta Esperanto-Centro el Đurđevac, Esperanto-societo Sisak, Unuiĝo de Prelegantoj de Esperanto kaj Unuiĝo de Zagrebaj Esperantistoj el Zagrebo, Esperanto-societo "Mondo paca" el Velika Gorica, individuaj membroj de Kroata Esperanto-Ligo el Zagrebo, Esperanto-societo Rijeka  k.a.

La labora parto de la programo de IAER okazis en la Urbodomo de Brežice. Post la enkonduka parolado de Anton Mihelič, la partoprenantojn salutis la vicurbestrino Katja Čanžar, kiu parolis ankaŭ pri turismaj allogaĵoj de la regiono. Tre vigle pri la ĉefa temo diskutis pluraj ĉeestantoj. Anton Mihelič mallonge informis pri EKP kaj en aparta prezento proponis eblajn kampojn por estonta kunlaboro, kiuj inkluzivas edukadon, informadon, interŝanĝon de vizitoj, laboron kun junularo ktp. Janez Zadravec prezentis "Bogračijada"-n, la urban feston de Lendava, en kiu jam tradicie partoprenas esperantistoj, kaj invitis la ĉeestantojn viziti ĝin.
En la kultura programo prezentiĝis la meza kantĥoro de la Kultura societo "Franc Bogovič" el Dobova, interalie tre bele per la Esperantigita slovena kanto "Ĝojigas". Tri membroj de EKP recitis slovenan poezion en Esperanto. Ĉe la fino prezentiĝis la gastantaj Esperanto-asocioj kaj okazis diskuto. En la labora parto kroataj esperantistoj informis la ĉeestantojn pri Esperanto-eventoj kaj aktivecoj en Kroatio, pri diversaj societoj kaj iliaj agadoj. Kroataj esperantistoj donacis diversajn Esperanto-eldonaĵojn por la biblioteko de EKP (ekz. 30-numeran kompleton de "Zagreba Esperantisto" kaj librojn) kaj la tipajn korformajn mielkukojn de Zagrebo. Mićo Vrhovac el Banja Luka prezentis la novan kantaron de serbaj kantoj en Esperanto, kaj eĉ tre simpatie kantis unu el ili, je ĝojo de la partoprenantoj.

En paŭzo la ĉeestantoj povis refreŝiĝi per manĝetoj kaj gustumado de lokaj kaj regionaj vinoj en la teretaĝo de la Urbodomo, dum kio okazis tostoj kaj bondeziroj, interparoloj kaj fotadoj. La frandaĵojn preparis aninoj de la EKP Reneja Mihelič kaj Ivana Vatovec kun afabla helpo de najbaroj.

Je la 14h00 komenciĝis iom pli ol duhora vizito al la Muzeo de Posavlje, situanta en la loka kastelo, kie pri la urbo parolis la membrino de EKP Ivana Vatovec.  La muzeo montriĝis tre riĉa kaj interesa por vizitantoj. Post la vizitado de la muzeo, ĉiuj IAER-anoj veturis al la kamparana bieno Vimpolšek, en kies korto la reprezentantoj de UZE disdonis al la ĉeestantoj malnovajn numerojn de "Zagreba Esperantisto". Plejparte la slovenaj esperantistoj kun agrabla suprizo prenis "Zagreban Esperantiston" por siaj societaj kaj privataj kolektoj kaj konfesis, ke la gazeto al ili estas nesufiĉe konata.

En la biena restoracio ĉe la familio Vimpolšek okazis komuna, sloventipa tagmanĝo, dum kaj post kiu la kunvenintoj daŭrigis interŝanĝi spertojn kaj informojn. Konklude, inter slovenaj kaj kroataj esperantistoj konfirmiĝis, ke la slovena esperantistaro nek sufiĉe konas nek vizitas la aranĝojn kaj aktivecojn, kiuj okazas en Kroatio. Ni invitis ilin al baldaŭ okazontaj aranĝoj "Esperantistoj de Bjelovar al sia urbo" (organizata de Bjelovara Esperantista Societo), "Verkista renkontiĝo" (organizata de Kroata Esperanto-Ligo), "Alp-adria konferenco" (organizata de Esperanto-societo Rijeka) kaj "Zamenhoftaga festo" (organizata de Unuiĝo de Zagrebaj Esperantistoj). Slovenaj esperantistoj estas invititaj partopreni ankaŭ la literaturan konkurson "Ivo Rotkvić", "Deklamkonkruson" kaj komunajn tradukprojektojn de DEC.

La komenca malavantaĝo, ke anstataŭ vere internacia, IAER fariĝis dulanda renkontiĝo, poste montriĝis bonŝanca, ĉar la du najbaraj esperantistaroj povis senĝene dediĉi sin al reciproka analizado de atingoj, kio malfermas novajn vojojn por estonta kunlaboro. La aranĝo mem akiris tre simpatian "familiecan" etoson, kiu ofte perdiĝas en grandaj internaciaj aranĝoj. IAER ebligis, ke la ne pli ol 60-membra partoprenantaro interkonatiĝu kaj establu amikajn intersocietajn, sed ankaŭ personajn kontaktojn, kio ja estis celita kaj eprimita eĉ en ĝia titolo.